Peqqussutissatut siunnersuummut nassuiaatit
Nalinginnaasumik nassuiaatit
Peqqussutissatut siunnersuut Kalaallit Nunaanni ineqarnerup tamakkiisumik nutarsarneqarneranut ingerlanneqartumut atasumik saqqummiunneqarpoq. Kingullermik pisortat inissiaataanni attartortittakkani ineqarnermut akiliutinik allanngortiterineq ingerlanneqarpoq, tamatumani ilaatigut siunertarineqarluni akissaqarluarnerusut nammineq ineqalernissamut kajumissaarneqarnissaat aammalu nammineq inissamik aningaasalersuinissamut ileqqaarniuteqarnissap siuarsarneqarnissaa.
Peqqussutissatut siunnersuut aqqutigalugu pisortat aningaasaataat atorlugit inissianik amerlanernik peqalernissamik aammalu inissianik namminerisanik amerlanernik pilersitsinissaq pillugu maanna suliniutit ingerlateqqinneqarput. Taamaalilluni pisortat inissiaataannik attartortittakkanik pisariaqartitsineq annikillisinneqassaaq, taakku inunnut nalinginnaasumik initaarnissamut utaqqisut allattorsimaffianniittunut ineqarnermullu tapiissuteqarnissamik pisariaqartitsisunut tunniunneqarsinnaaniassammata.
Peqqussutissatut siunnersuut ilaqutariinnut akunnattumik isertitalinnut imaluunniit isertitaqqortuunut nammineq illuliorusuttunut, suliffeqarfinnut ingerlatseqatigiiffinnulluunniit namminersortunut sulisorisanut inissianik pisariaqartitsisunut aammalu aningaasaliissuteqartartunut attartortittakkanik inissialiorusuttunut sammitinneqarpoq. Aammattaaq inuit allat ataatsimoorlutik assersuutigalugu ilaqutariinnut marlunnut illunik, illunik uiguleriiaanik illunillu ataqatigiiaanik sanarusuttut pineqarsinnaapput.
Sanaartukkanut taarsigassarsisitsisinnaaneq aningaasalersueriaatsinut ilisimariikkanut, assersuutigalugu 60/40 atorlugu illulianut, piginneqatigiilluni inissianut, nunaqarfinni inissianut, nammineerluni illulianut aammalu kommunit illuutaannut katiteriaannarnut atatillugu tapertaliussatut isigineqarsinnaavoq.
Peqqussutissatut siunnersuutip allaffissornermik ingerlatsinikkut kingunerisassaiPeqqussutissatut siunnersuut taarsigassarsianik qinnuteqaatinik suliarinninnermut atatillugu kommunini Namminersornerullutik Oqartussanilu suliat annertusinerannik kinguneqassaaq, ataatsimut isigalugu qinnuteqaatit amerlinissaat naatsorsuutigineqarsinnaammat. Inuit sanaartugassanut taarsigassarsianik qinnuteqarnissamik periarfissamik atuisut amerlassusiisa allanngornatik ukiumut qinnuteqaatit 15-20-nik amerlassuseqarnissaat naatsorsuutigineqarpoq. Suliffeqarfiit ingerlatseqatigiiffiillu inissianik attartortittakkanik nalinginnaasunik sulisorisanullu inissianik sanaartornissamut taarsigassarsianik qinnuteqarsinnaanermik periarfissamik atuinissaat naatsorsuutigineqartariaqarpoq.
Peqqussutissatut siunnersuutip aningaasaqarnikkut kingunerisassaiPeqqussutissatut siunnersuut inissiamut ataatsimut annertunerpaamik katillugit 567.00 kr.-inik aningaasalersuinissamik pisariaqartitsinissamik kinguneqassaaq, Namminersornerullutik Oqartussanut kommunimullu agguaqatigiissillugu 283.500 kr.-inik, illuatungeriit tamarmik sanaartukkanut taarsigassarsisitsinissartik piareersimaffigissappassuk.
Aalajangersakkanut ataasiakkaanut nassuiaatit
§ 1, nr. 1-imut
Malittarisassaq inunnut ataasiakkaanut, suliffeqarfinnut ingerlatseqatigiiffinnullu sanaartukkanut taarsigassiisinnaanermik kinguneqassaaq. Illuliat ilaqutariinnut arlalinnut illutut, illutut uiguleriiaatut illutullu ataqatigiiaatut imaluunniit ilaqutariinnut ataatsinut aamma ilaqutariinnut marlunnut illutut sananeqarsinnaapput aammalu nammineq illutut, attartortakkatut imaluunniit sulisorisanut atorneqarsinnaallutik. Malittarisassat maanna atuuttut malillugit inuit ataasiakkaat kisimik ilaqutariinnut ataatsinut illunik sananissamut taarsigassarsianik qinnuteqarsinnaasimasut, maanna peqqussutissatut siunnersuutikkut inuit ataasiakkaat inuillu inatsisitigut pisussaaffilikkat, soorlu suliffeqarfiit ingerlatseqatigiiffiillu sanaartugassanut taarsigassarsianik qinnuteqarnissaannut periarfissamik ammaassivoq. Aammattaaq malittarisassat inissianik inunnit ataasiakkaanit pigineqartunik iluarsartuussinermut pitsanngorsaanermullu taarsigassiisinnaanermik kinguneqarpoq.
§ 1, nr. 2-mutMalittarisassami illup tunngavissaata tapiiffigineqarsinnaatitaasup anginerpaaffissaa aalajangersarneqarpoq, angissusissaq taanna piginneqatigiilluni inissianut tapiissutinut atuuppoq kiisalu sananeqarnerani aningaasartuutit tapiiffigineqarsinnaatitaasut amerlanerpaaffissaa nuna tamaat isigalugu angissusilerneqarsimasoq aalajangersarneqarluni. Amerlanerpaaffissat maannamut atuuttut ingerlaqqinnerivaat.
Malittarisassap kingunerissavaattaaq taarsigassarsisup pisortanit tapiiffigineqarnani nammineq akilerlugu anginerusunik akisunerusunillu illuliorusuttoq tamatumunnga aningaasartuutit nammineq aningaasalersussagai. Malittarisassami aalajangersarneqarportaaq illuliap kvadratmeterimut akia qanoq angissusilerneqassanersoq.
§ 1, nr. 3-mutMalittarisassami taamaallaat innersuussutigineqartoq erseqqissarneqarpoq.
§ 1, nr. 4-mutMalittarisassap kingunerissavaa pisortanit taarsigassarsiat piginnittut nikinnerini akilerneqartussanngussasut, tamanna atuutissalluni ukiuni siullerni 15-ini, tamatumani taarsigassarsiat erniartaqarnatillu akilersuutitaqassanatik, soorluttaaq tamatuma kingorna ukiuni qulini taarsigassarsiat akilersorneqarnerini. Malittarisassap kingunerissavaattaaq pisortanit taarsigassarsiat akilerneqartussanngussasut piffissap akilersuiffissap aallartereernerata kingorna erniat akilersuutillu piffissaq eqqorlugu akilerneqanngippata, imaluunniit aserfallatsaaliisimannginneq paarsinerlussimanerluunniit pissutigalugit taarsigassarsisup qularnaveeqqusiissutaa nalikinnerulersimappat.
§ 1, nr. 5-imutMalittarisassap kingunerissavaa pisortanit taarsigassarsiat akilerneqartassanngitsut sanaartukkap naammassineranut atasumik piginnittut nikissimappata, assersuutigalugu pisumi inissianut aningaasaateqarfiup sanaartortitsisulluunniit inissialiorpata naammassineratalu kingorna ingerlaannaq tunillugit.
§ 1, nr. 6-imutMalittarisassap taamaallaat kinguneraa kapitalip qulequtaata allannguutaa, qulequtaani pineqarmata "illuliat " "ilaqutariinnut ataatsinut illuliat" pineqarnatik.
§ 1, nr. 7-mutMalittarisassap kingunerissavaa illuliat naammasseriikkat iluarsartuunnerinut pitsanngorsarnerinulluunniit Naalakkersuisunit 40 %-imik taarsigassarsisoqarsinnaasoq. Malittarisassap kinguneraa erniartaqanngitsunik akilersuutitaqanngitsunillu taarsigassarsisoqarsinnaasoq taarsigassarsisup sinneri nammineq aningaasalersorsinnaappagit. Malittarisassaq siullertut illunut nutaan-ngitsunut aammalu mikinerugajuttunut, assersuutigalugu boligstøtte atorlugu illulianut inissialiornernut tapiissuteqartarneq pillugu peqqussummit ilaajunnaarsimasunut, sammisuuvoq. Naalakkersuisut allatut aalajangiitinnagit piginnittut nikinnerisigut taarsigassarsiat akilerneqartassapput. Assersuutigalugu tassaasinnaavoq kingornussisussanut tunniussisoqartillugu.
§ 1, nr. 8-mutMalittarisassap kingunerissavaa qinnuteqarnissamut piffissarititaq kingusinnerpaamik martsip aallaqqaatigissagaa. Tamatuma kingorna sulianik ingerlatsineq ingerlanneqalersinnaassaaq aammalu taarsigassarsinermut uppernarsaat tunniunneqarsinnaalissalluni. Malittarisassaq taarsigassarsianik qinnuteqaatinik suliarinninnerup eqaannerulerneranik kinguneqassaaq, ukiumi aningaasaliissutinik qinnuteqarfiusumi sanaartugassanut taarsigassarsianik aningaasaliissuteqarnissamut periarfissaq ammaanneqarmat. Tamakku saniatigut malittarisassanut atuuttunut sanilliullugu allannguuteqanngilaq.
§ 1, nr. 9-mutMalittarisassaq malittarisassap atuuttup iluarsinerinnaraa, malittarisassami pineqarmata "illuliat" "ilaqutariinnut ataatsinut illuliat" pineqarnatik.
§ 2-mutMalittarisassami siunnersuutigineqarpoq peqqussutissatut siunnersuut 1. juli 2002-mi atuutilissasoq.